2019-cu il yanvarın 1-nə Azərbaycanın birbaşa və zəmanətli xarici dövlət borcu 8 mlrd. 927,1 mln. dollar təşkil edir. Bu barədə hökumətdən məlumat verilib.
Xəbər verildiyi kimi, 2018-ci il yanvarın 1-nə Azərbaycanın birbaşa və zəmanətli xarici dövlət borcu 9 mlrd. 398,3 mln. dollar təşkil etmişdi. Beləliklə, ötən il xarici borc 5% azalıb.
“2019-cu il yanvarın 1-nə Azərbaycanın birbaşa və zəmanətli xarici dövlət borcu 8 mlrd. 927,1 mln. dollara və ya ÜDM-nin 19%-nə bərabərdir. Xarici borcun strukturunda 4 mlrd. 997,7 mln.dollar və ya 56% hökumətin cəlb etdiyi kreditlərin, 3 mlrd. 157,9 mln. dollar və ya 35,4% xarici valyutada dövlət qiymətli kağızlarının, 771,5 mln. dollar və ya 8,6% xarici dövlət borcu sayılan şərti öhdəliklərin payına düşüb”, - deyə məlumatda bildirilir.
2018-ci ildə Azərbaycan 875,2 mln. dollar məbləğində kredit istifadə edib.
Ötən il xarici borca xidmət göstərilməsi üçün dövlət büdcəsindən 1 mlrd. 218,8 mln. dollar yönəldilib, bunun 920,1 mln. dolları əsas borc, 298,7 mln. dolları isə faiz ödənişlərinin payına düşüb.
1 yanvar 2019-cu il tarixinə əhalinin hər nəfərinə düşən xarici borcun məbləği 895 dollar təşkil edir.
Prezident İlham Əliyev 2018-ci il avqustun 24-də “Azərbaycan Respublikasında dövlət borcunun idarə edilməsinə dair orta və uzun müddət üçün Strategiya”nı təsdiq edib.
Sənədə əsasən 2026-cı ilə kimi Azərbaycanın xarici borcu 2017-ci ilin sonuna ÜDM-nin 22,8%-dən ÜDM-nin 12%-dək azalacaq.
İnterfaks-Azərbaycan
