"Moody's" beynəlxalq reytinq agentliyi Azərbaycanda müşahidə olunan nisbətən yüksək inflyasiyanın 2017-ci ildə də davam edəcəyini bildirib. "Moody's" agentliyinin "MDB ölkələrinin müstəqil reytinq perpektivləri" adlı hesabatına istinadən verdiyi xəbərə görə, Azərbaycan hələ də inflyasiya ilə mübarizə aparır. O, Azərbaycanın region ölkələrinin əksinə, monetar siyasətini yumşaltmadığını qeyd edib. Buna səbəb kimi isə Azərbaycanın nefti qiymətlərinin kəskin azalmasına gec reaksiya verməsi amilini göstərib. Məhz bu səbəbdən Agentlik Azərbaycanın bütün gücünü 2016-cı ildə inflyasiyanı nəzarət altına almağa sərf etdiyini xatırladıb. Agentliyin ekspertlərinin fikrincə, sabit neft qiymətləri Azərbaycanın yenidən makroiqtisadi genişlənmə həyata keçirə biləcəyini mümkün edəcək.
Azərbaycan Mərkəzi Bankının (AMB) siyasətini təhlil edən "Moody's" qeyd edib ki, 2016-cı ilin sentyabrında artan inflyasiya və bank sektoruna təzyiqlər nəticəsində uçot dərəcəsinin 9,5%-dən 15%-dək artırılması siyasəti ən azı 2017-ci ilin başlanğıcında da davam etdiriləcək.
"Moody's" Azərbaycanın aşağı borc səviyyəsini, önəmli valyuta ehtiyatlarını və 2016-cı ilin ilk yarısında büdcə icrasının effektivliyinin gələcəkdə fiskal xərclərin artırılmasına kömək edəcəyini də qeyd edir.
Agentlik 2017-ci ildə MDB ölkələri üzrə Borc/ÜDM əmsalının 1,4 faiz bəndi, 2018-ci ildə 1,3 faiz bəndi artacağını proqnozlaşdırır. Azərbaycanda isə 2018-ci ildən etibarən bu göstəricinin azalacağı, 2017-ci ildə isə borcun ÜDM-də xüsusi çəkisinin 39% olacağı gözlənilir. Azərbaycanın xarici valyutada borcunun MDB-də ən yüksək ölkələrdən biri olduğu və 2017-ci ildə xarici valyutada borcun dövlət borcunda xüsusi çəkisinin bir qədər azalaraq 77%-ə enəcəyini proqnozlaşdırılır.
Mənbə: Report.az
