Azərbaycanda ilk dəfə küçə reklamlarının monitorinq xidmətini təklif edən sayt açılıb.
“Smart Outdoor” sistemi artıq cari ilin yanvar ayından istifadəyə verilib.
Platformanın köməyilə siz rəqiblərin outdoor reklam strategiyasını analiz edə, vizual olaraq bütün küçə reklamlarının monitorinqini apara və öz reklam strategiyanızı planlaya bilərsiniz.
“Smart Outdoor” platforması ilə kateqoriya üzrə brendlərin həm konstruksiya sayı və növünə görə, həm də büdcəsinə görə analiz edə biləcəksiniz. “Smart Outdoor” platformasından istifadə edərək, konkret lokasiyalarda konstruksiya növünü seçə bilər, həmin yerin vizual olaraq monitorinqini apara bilərsiniz.
Boş yerlərə, rəqiblərin reklam konstruksiya sayına, büdcəsinə və geniş kateqoriya analizinə əsaslanaraq daha rahat outdoor reklam planlamasını apara biləcəksiniz.
Beləliklə sayt vasitəsilə, daha asan yolla rəqibləri analiz edə, daha rahat reklam strategiyasını planlaya, xəritə üzrə vizual monitorinq əldə edə biləcəksiniz.
“Smart Outdoor” sistemi ilə monitorinq xidməti hazırda Bakı, Abşeron, Sumqayıtı əhatə edir. Amma növbəti mərhələdə araşdırmaya daxil olan regionların sayı daha da artırılacaq”, - deyə Smartoutdoor.az-ın direktoru Rahim Davudov bildirib.
Rahim Davudov qeyd edib ki, platforma sırf marketoloqlar, marketinq əhli üçün nəzərdə tutulub:
“Sayt əvvəlcədən planlaşdırma işində marketoloqlara dəstəkçi olacaq. Məsələn, siz bank sektoru üzrə küçə reklamlarının monitoriniqini əldə etməklə, rəqiblərinizi analiz edəcəksiniz.
2018-ci il yanvar ayında küçə reklamlarında 14 bankın 104 konstruksiyada reklamı yayımlanıb. Kredit reklamı 48, kart reklamı 27, pul köçürmələri 5 və 24 reklamda kampaniyalarının imiclərini reklam ediblər. Araşdırma ilə tanış olan marketoloq rahatlıqla kampaniyasını planlaşdıra biləcək. Bu da sektorda adiyyəti sahə üzrə kor-koranə planlaşdırmanın qarşısını alacaq”.
Direktor əlavə edib ki, hesabatlar aylıq hazırlanır və bu işin ərsəyə gəlməsi üçün onlarla əməkdaş fəaliyyət göstərir:
“Məsələn, yanvar ayı ərzində (demo versiya üçün - red.) Bakı, Abşeron, Xırdalanda olan küçə reklamları, dəyişikliklər ilə bərabər fotoları çəkildi və dərhal sayta yükləndi. Bütün hər kəs saytdan qeydiyyatdan belə keçmədən, demo versiyaya daxil olub, saytın necə işlədiyinə baxa bilərlər. Demo versiya hər kəsə əlçatandır”.
Xatırlatmaq yerinə düşər ki, demo versiyada yalnız 2018-ci ilin yanvar ayının araşdırması yer alıb. Digər aylar üzrə adıçəkilən sektor üzrə bazar araşdırması ilə tanış olmaq üçün xidməti ödənişlə almalısınız.
Qeyd edək ki, araşdırma avtomobil, qida, kosmetika, bank, məişət avadanlıqları, mobil rabitə, restoran və s. olmaq üzrə küçə reklamlarının müxtəlif kateqoriyaları üzrə aylıq araşdırmanın nəticələrini təklif edir.
Yuxarıda qeyd etdiyimiz kimi, XƏRİTƏ imkanının köməyilə siz küçə reklamlarının konkret ərazidəki fotosu ilə tanış ola biləcəksiniz.
