Azərbaycanın aparıcı mobil rabitə operatoru olan "Azercell Telekom" ilk dəfə 5G şəbəkəsinin pilot olaraq Bakının mərkəzində istifadəyə verib.
Şirkətdən verilən məlumata görə, şəbəkə ilk olaraq Fəvvarələr meydanını əhatə edib.
Yeni şəbəkənin təqdimatında çıxış edən “Azercell Telekom”un prezidenti Vahid Mürsəliyev qeyd edib ki, şirkət bu ilin dekabrın əvvəlindən etibarən 5G şəbəkəsini dəstəkləyən mobil telefonlarının satışına başlayacaq.
"Müştərilər bu telefonları əldə edərkən onlara ödənişsiz şəkildə 5G texnologiyasını dəstəkləyən SİM-kartlar da təqdim olunacaq", - deyə V. Mürsəliyev qeyd edib.
Gələn ilin sonunadək "Azercell"in 5G şəbəkəsi Bakının bütün ərazisini əhatə edəcək
“Azercell Telekom” şirkəti gələn ilin sonunadək Bakının bütün ərazisini 5G şəbəkəsi ilə əhatə edəcəyini planlaşdırır.
Bunu jurnalistlərə açıqlamasında şirkətin prezidenti Vahid Mürsəliyev deyib.
Onun sözlərinə görə, bundan sonra şəbəkənin əhatə dairəsi regionlarda genişləndiriləcək və bazar hazır olduqda şəbəkənin kommersiya istifadəsi bütün ölkə üzrə istifadəyə veriləcək.
Qeyd edək ki, hazırda şirkət tərəfindən pilot 5G şəbəkəsi Bakının mərkəzində (Fəvvarələr meydanında) yaradılıb. Şirkət prezidentinin sözlərinə görə, yaxın günlərdə qeyd olunan məkanda daha bir neçə 5G baza stansiyaları quraşdırılacaq.
"Yaradılan 5G pilot şəbəkədə xidmətlər təxminən 7-8 baza stansiya üzərindən göstəriləcək", - deyə V. Mürsəliyev qeyd edib.
APA
