Müəllif: Gülbəniz Hüseynli, Banco.az
2019-2023-cü illər ərzində Azərbaycandan 880 milyon 466.7 min ABŞ dolları dəyərində 789 min 311 ton pomidor ixrac edilib.
Banco.az Dövlət Gömrük Komitəsinin hesabatına istinadən xəbər verir ki, 2019-2023-cü illər ərzində pomidor ixracı, bu illər ərzində ümumi kənd təsərrüfatı məhsulları ixracının (3 mlrd. 237.1 mln. dollar) 27.2%-ni təşkil edib.
Qeyd edək ki, Azərbaycandan pomidor əsasən Rusiyaya ixrac edilib. Belə ki, 2019-2023-cü illər ərzində ölkədən Rusiyaya 861 milyon 639 min dollar dəyərində pomidor ixrac edilib. Beləliklə Rusiyaya pomidor ixracı, Azərbaycanın ümumi pomidor ixracının 97.9%-ni təşkil edib.
Xatırladaq ki, hesabat dövründə pomidorun 1 kiloqramının orta ixrac qiyməti 1.11 ABŞ dolları təşkil edib. 2024-cü ilin 7 ayı ərzində Azərbaycandan 139,524 min dollar dəyərində 116,935 ton pomidor ixrac edilib. 2023-cü ilin eyni dövrü ilə müqayisədə Azərbaycandan pomidor ixracı dəyər ifadəsində 15 357 min dollar və ya 12,4%, kəmiyyət ifadəsində isə 5 065 ton və ya 4,5% artıb. 2023-cü ilin 7 ayı ərzində Azərbaycandan 124,167 min dollar dəyərində 111,871 ton pomidor ixrac edilib.
2024-cü ilin birinci yarısında Azərbaycan və Rusiya arasında ticarət dövriyyəsi 2,168 milyon dollar təşkil edib. Azərbaycan Gömrük Komitəsinin hesabatına əsasən, yanvar-iyun ayları ərzində Azərbaycan məhsullarının Rusiyaya ixracı 10,4% azalaraq 556,592 milyon dollar, Rusiya Federasiyasından idxalı isə 1,611 milyon dollar (4,4% artım) təşkil edib.
Rusiya Dövlət Gömrük Komitəsindən bildirilib ki, ilin birinci yarısında Azərbaycan və Rusiya Federasiyası ilə ticarət əməliyyatlarında xarici ticarət dövriyyəsi 9.96%-ni təşkil edib.
Bizi sosial şəbəkələrdən izləyin!!
