Müəllif:Mehin Qasımova,Banco.az
Qlobal qeyri-müəyyənliklər, artan geosiyasi risklər və sərbəst hərəkət imkanlarına tələbat son illərdə ikinci vətəndaşlığa marağı əhəmiyyətli dərəcədə artırıb.
Banco.az xəbər verir ki, ABŞ-də fəaliyyət göstərən "International Living" təşkilatı 2026-cı il üçün investisiya yolu ilə vətəndaşlıq (CBI) proqramlarını qiymətləndirən yeni hesabatını açıqlayıb.
Təşkilatın icraçı redaktoru Cennifer Stivens bildirib ki, ikinci pasport beynəlxalq səyahət, investisiya planlaşdırması və xaricdə uzun müddət yaşamaq baxımından böyük rahatlıq yaradır.
Bir çox Karib dövləti investisiya qarşılığında vətəndaşlıq verən proqramları ilə seçilir.
-
Sent Kits və Nevis – proqramı tətbiq edən ilk ölkələrdən biridir. Dövlət fonduna 250 min dollar ianə və ya 325 min dollar dəyərində daşınmaz əmlak investisiyası tələb olunur.
-
Antigua və Barbuda – 230 min dollar ianə və ya 300 min dollar investisiya tələb edilir. İlk 5 ildə ölkədə ən azı 5 gün qalmaq şərtdir.
-
Dominika – ən əlçatan variantlardan biridir və minimum 200 min dollar investisiya tələb olunur.
-
Qrenada – təxminən 235 min dollar investisiya ilə vətəndaşlıq təklif edir və ABŞ investor vizasına müraciət imkanı verir.
-
Sent-Lüsiya – 240 min dollar ianə və ya 300 min dollar daşınmaz əmlak investisiyası tələb olunur.
Yaxın Şərq və digər regionlar
Bəzi ölkələr isə daha fərqli şərtlərlə vətəndaşlıq proqramları təqdim edir.
-
Misir – 100 min dollar ianə və ya 500 min dollar depozit müqabilində vətəndaşlıq verir.
-
İordaniya – proqram üçün təxminən 1,4 milyon dollar investisiya tələb olunur və əsasən varlı investorlar üçün nəzərdə tutulub.
Asiya və Avropa istiqamətləri
-
Kamboca – təxminən 245 min dollar investisiya ilə vətəndaşlıq təqdim edir.
-
Vanuatu – 130 min dollardan başlayan və ən sürətli proseslərdən biri hesab olunur.
-
Şimali Makedoniya – 200 min avrodan başlayan investisiya ilə vətəndaşlıq almaq mümkündür.
-
Türkiyə – 400 min dollar dəyərində daşınmaz əmlak və ya 500 min dollar depozit/investisiya tələb edir və aktivlər ən azı 3 il saxlanılmalıdır.
Mütəxəssislər qeyd edirlər ki, artan siyasi və iqtisadi qeyri-müəyyənlik fonunda investisiya yolu ilə vətəndaşlıq proqramlarına marağın yaxın illərdə daha da artacağı gözlənilir.
