Müəllif:Ayşən İmanova/Banco.az
İyul ayında Argentinada qiymətlər 4% artıb, ilin əvvəlindən isə inflyasiya demək olar ki, 90%-ə çatıb.
Banco.az xəbər verir ki, bu barədə ölkənin Statistika və Siyahıyaalma İnstitutu məlumat yayıb.
“İstehlak qiymətləri indeksi 2024-cü ilin iyul ayında 4%, ilin əvvəlindən isə 87% artıb. Ötən ilin iyul ayı ilə müqayisədə artım 263,4% təşkil edib”, - məlumatda deyilir.
Bildirilib ki, ən çox qiymət artımı restoran və mehmanxanalarda (+6,5%) müşahidə olunub. Sonrakı yerdə spirtli içkilər və tütün məmulatları (+6,1%), o cümlədən kommunal xidmətlər (+6%) gəlir ki, iyunda əvvəlki ayla müqayisədə artıq 14,3% bahalaşıb. Ərzaq məhsullarının qiymətləri isə 3,2% artıb.
Yüksək inflyasiyaya baxmayaraq, hökumət qiymət artım tempini aşağı sala bilib. İyul göstəricisi 2022-ci ilin yanvarından bəri ən aşağı göstərici olub.
İnflyasiyanın azalması iqtisadi aktivliyin azalması fonunda baş verir: İyun ayında sənaye istehsalı indeksi 1,6% azalıb.
Qeyd edək ki, Argentina artıq bir neçə ildir ki, ən yüksək inflyasiyaya malik ölkələr sırasındadır. 2023-cü ildə qiymət artımı 211,4%, 2022-ci ildə 94,8%, 2021-ci ildə isə 50,9% təşkil edib.
Noyabrın 19-da Xavyer Mayli prezident seçildikdən sonra inflyasiya sürətlənib.
Onun hökumətinin ilk tədbirlərindən biri dolların rəsmi məzənnəsini bir dollar üçün 366 pesodan 800 pesoya qaldırmaq olub.
Bizi sosial şəbəkələrdən izləyin!!
