Müəllif:Mehin Qasımova,Banco.az

“Apple” şirkəti iPhone və Apple Watch cihazlarında istifadə edilən toxunma əks-əlaqə texnologiyası ilə bağlı patent mübahisəsində çıxarılan 5,7 milyard dollarlıq təzminat qərarına etiraz edib.

Banco.az  xəbər verir ki, şirkət San Dieqodakı federal məhkəməyə müraciət edərək qərarın ləğvini istəyib. “Apple” təzminat məbləğini əsaslandırmaq üçün kifayət qədər sübut olmadığını və qərarın “heç bir dəlilə əsaslanmadığını” iddia edir.

Mübahisə toxunma hissini imitasiya edən titrəyiş texnologiyaları hazırlayan “Taction Technology” şirkətinin 2021-ci ildə “Apple”a qarşı qaldırdığı patent iddiasından qaynaqlanır.

Sentyabrın 25-də işə baxan münsiflər heyəti “Apple”ın cihazlarında istifadə etdiyi “Taptic Engine” texnologiyasının “Taction Technology” şirkətinə məxsus iki patenti pozduğuna qərar verib.

“Apple” isə son məhkəmə müraciətində 5,7 milyard dollarlıq təzminatın hesablanmasını mübahisələndirib.

Qeyd edək ki, qərar qüvvədə qalarsa, bu məbləğ ABŞ tarixində patent pozuntusu ilə bağlı ən böyük təzminat qərarlarından biri olacaq. Apellyasiya şikayətinin nəticəsi isə mübahisənin yekun maliyyə nəticəsini müəyyən edə bilər.