Müəllif: Tamara Mustafayeva, Banco.az
“Amazon” qlobal enerji və elektrik provayderi “Iberdrola” ilə əməkdaşlığı genişləndirir.
Banco.az xəbər verir ki, ABŞ-ın texnologiya nəhəngi "Amazon" məlumat mərkəzlərinə enerji təmin etmək üçün İspaniya və Portuqaliyada 476 meqavatlıq külək və günəş enerjisi almaq barədə razılığa gəlib.
Çoxmillətli xidmət təminatçısı "Iberdrola" ilə imzalanan enerji satınalma müqavilələri "Amazon"un bölgədə planlaşdırdığı yeni məlumat mərkəzlərini enerji ilə təmin etməsinə kömək edəcək. Ötən ilin may ayında şirkət İspaniyada məlumat mərkəzləri də daxil olmaqla infrastruktur layihələrinə 10 il ərzində ümumilikdə 17 milyard dollar sərmayə yatıracağını elan etmişdi.
"Amazon"un elektrik xərcləri süni intellekt və bulud xidmətlərinə artan tələbatı qarşılamaq üçün daha çox məlumat mərkəzi əlavə etdikcə son zamanlarda sürətlə yüksəlir.
Şirkətin satın aldığı layihələrdən biri olan "Tâmega" külək stansiyası Portuqaliyada nəhəng bir hidroelektrik bənd sisteminin yanında inşa edilir. "Tâmega" tamamlandıqdan sonra ölkənin ən böyük külək stansiyası olacaq və təxminən 128 min evin illik enerji tələbatını ödəyəcək. "Iberdrola" bu layihə üçün 350 milyon avro sərmayə yatıracaq.
2024-cü ildə "AWS"i süni intellekt əsaslı iş yükləri üçün əsas bulud təminatçısı kimi seçən "Iberdrola" bu texnologiyanı elektrik şəbəkəsi bağlantılarının təkmilləşdirilməsi, külək stansiyalarının dizaynının optimallaşdırılması və hava proqnozu simulyasiyaları üçün istifadə edir.
Bizi sosial şəbəkələrdən izləyin!!
