Müasir biznes mühitində şirkətlərin dayanıqlı inkişafı üçün maliyyə resurslarına operativ çıxış mühüm əhəmiyyət daşıyır. Xüsusilə kiçik və orta biznes subyektləri (KOB) üçün ənənəvi kreditləşmə ilə yanaşı, alternativ maliyyələşdirmə mexanizmləri də getdikcə daha çox əhəmiyyət qazanır. Bu alətlərdən biri də aktiv əsaslı maliyyələşdirmədir.
Aktiv əsaslı maliyyələşdirmə sahibkarların mövcud resurslarından daha səmərəli istifadə etməsinə, dövriyyə kapitalını gücləndirməsinə və biznes fəaliyyətini genişləndirməsinə imkan verən müasir maliyyə alətlərindən biridir.
Aktiv əsaslı maliyyələşdirmə şirkətin sahib olduğu aktivlərin girov qoyulması əsasında maliyyə vəsaitinin cəlb edilməsini nəzərdə tutur. Bu zaman debitor borcları, mal-material ehtiyatları, istehsal avadanlıqları, nəqliyyat vasitələri kimi aktivlər maliyyələşmənin təminatı kimi istifadə oluna bilər.
Bu modeldə maliyyə qurumu kredit qərarı verərkən yalnız şirkətin gəlir göstəricilərini deyil, eyni zamanda təqdim olunan aktivlərin bazar dəyərini, likvidliyini və keyfiyyətini də qiymətləndirir.
Hansı aktivlər maliyyələşmə üçün istifadə oluna bilər?
Aktiv əsaslı maliyyələşdirmədə müxtəlif növ aktivlər təminat rolunu oynaya bilər. Bunlara daxildir: mal və xammal ehtiyatları, istehsal avadanlıqları və texnikalar, nəqliyyat vasitələri, debitor borclar.
Aktivin növündən, bazar dəyərindən və likvidlik səviyyəsindən asılı olaraq maliyyələşmənin həcmi müəyyən edilir.
Bu maliyyələşmə modeli hansı üstünlükləri təqdim edir?
Aktiv əsaslı maliyyələşdirmə xüsusilə inkişaf mərhələsində olan və ya dövriyyə kapitalına ehtiyac duyan müəssisələr üçün bir sıra üstünlüklər yaradır.
Bu maliyyə həlli müəssisələrə dövriyyə kapitalına daha operativ çıxış imkanı yaradaraq mövcud aktivlərdən daha səmərəli istifadə etməyə şərait yaradır. Eyni zamanda, biznesin likvidliyini gücləndirir, mövsümi və qısamüddətli maliyyə ehtiyaclarının çevik şəkildə qarşılanmasını təmin edir. Nəticədə, istehsal və satış proseslərinin fasiləsiz davam etdirilməsinə, şirkətlərin fəaliyyətinin dayanıqlığının və əməliyyat səmərəliliyinin artırılmasına dəstək verir.
Nələrə diqqət yetirilməlidir?
Bu maliyyələşmə modelindən istifadə etməzdən əvvəl şirkətlər təqdim etdikləri aktivlərin hüquqi vəziyyətini, bazar dəyərini və likvidliyini nəzərə almalıdırlar. Maliyyə təşkilatı aktivlərin qiymətləndirilməsini həyata keçirir və maliyyələşmənin məbləğini həmin qiymətləndirmənin nəticələrinə əsasən müəyyən edir.
