Müəllif:Mehin Qasımova,Banco.az

ABŞ Federal Dəniz Komissiyası İspaniya bayrağı altında üzən və ABŞ limanlarına daxil olan ticarət gəmilərinə 200 min dollar rüsum tətbiq edilməsini təklif edib. Təklif çərçivəsində İspaniya məhsullarının, o cümlədən zeytun yağının ABŞ-a idxalına məhdudiyyətlər qoyulması da nəzərdə tutulur.

Banco.az  xəbər verir ki, bu barədə “Reuters” agentliyi məlumat yayıb.

Agentliyin məlumatına görə, təklif olunan tədbirlərlə bağlı hələ yekun qərar verilməyib. Təşəbbüsün qüvvəyə minməsi üçün ABŞ prezident administrasiyası tərəfindən nəzərdən keçirilməsi tələb olunur.

Komissiya bu təklifləri İspaniyanın ABŞ bayrağı altında üzən gəmilər üçün əlverişsiz şərait yaratdığı iddiası ilə əsaslandırıb. Söhbət İsrailə yük daşıyan üç Amerika gəmisinin İspaniya limanlarına girişinə icazə verilməməsindən gedir.

ABŞ Prezidenti Donald Tramp daha əvvəl İspaniyanı NATO çərçivəsində yaxşı müttəfiq olmamaqda ittiham edib. Vaşinqton Madridin İrana qarşı hərbi əməliyyatlar zamanı tutduğu mövqedən və NATO üzvlərinin müdafiə xərclərini ÜDM-in 5%-nə çatdırmaq təşəbbüsünə qoşulmamasından narazılığını ifadə edib.

Tramp həmçinin ABŞ-ın İspaniya ilə ticarət əlaqələrini dayandıra biləcəyini bildirib.

Təklif olunan rüsum və idxal məhdudiyyətləri reallaşarsa, bu, iki ölkə arasında ticarət münasibətlərinə təsir göstərə bilər. Bununla belə, tədbirlərin tətbiqi və mümkün iqtisadi nəticələri barədə yekun qərar hələ açıqlanmayıb.