Müəllif: Tamara Mustafayeva, Banco.az
ABŞ-da vergilərin 4,5 trilyon dollar azaldılması planlaşdırılır.
Banco.az xəbər verir ki, BBC-nin xəbərinə görə, müdafiə və sərhəd təhlükəsizliyi üçün təxminən 300 milyard dollarlıq artım və 10 il ərzində 4,5 trilyon dollarlıq vergi endirimi təmin etməyi hədəfləyən büdcə planı Nümayəndələr Palatasında səsverməyə çıxarılıb.
Səsvermənin nəticəsində büdcə planı 215 "əleyhinə" səsə qarşı 217 "lehinə" səslə qəbul edilib.
Büdcə planının qanun halına gələ bilməsi üçün Senatın büdcə layihəsi ilə birləşdirilməsi də daxil olmaqla bir sıra mərhələlərdən keçməsi tələb olunur.
Konnektikut ştatının Demokrat senatoru Kris Mörfi ABŞ Konqresinin yerləşdiyi Kapitoli təpəsində təşkil olunan mitinqdə bu vergi endirimindən ən çox varlıların faydalanacağını bildirib.
Mörfi büdcə layihəsini "yoxsuldan alıb varlıya vermək" kimi xarakterizə edərək, bunu "ölkə tarixindəki ən böyük sərvət və resurs transferi" adlandırıb.
Büdcə planı federal xərclərdə təxminən 2 trilyon dollarlıq ixtisarları da nəzərdə tutduğu üçün Demokratlar tərəfindən tənqid olunub.
Demokratlar aşağı gəlirli şəxslərə tibbi xidmət göstərən Medicaid proqramı kimi sosial təminat dəstəklərinə yönəldilmiş xərclərin azaldılacağından narahat olduqlarını ifadə ediblər.
Bizi sosial şəbəkələrdən izləyin!!
