Büdcə gəlirlərinin formalaşması üçün neftin qiymətinin real həddə götürülməsi çox vacibdir. Hər il növbəti ilin dövlət büdcəsinin parlamentdə müzakirəsi zamanı bu məsələ gündəmə gəlir. Ötən ildən başlayaraq dünya bazarlarında neftin 2 dəfədən çox ucuzlaşması onun büdcədəki qiymətinə diqqəti daha da artıb. 2014-cü ilin büdcəsində neftin qiyməti barel üçün 100 dollar, 2015-ci ilin büdcəsində 90 dollar nəzərdə tutulduğu halda 2016-cı ilin büdcəsində ilkin məlumatlara görə, bu rəqəm 50 dollar həddində götürülüb.
Bəs, neftin bu qiyməti nə dərəcədə realdır? budget.az saytı 2016-cı ilin dövlət büdcəsinin müzakirəsi dövründə neftin qiyməti barədə ictimaiyyətin, o cümlədən ekspertlərin fikrini öyrənmək üçün öz səhifəsində internet sorğu yerləşdirib.
İnternet sorğuda yerləşdirilmiş “Sizcə, hökumət 2016-cı ilin dövlət büdcəsində neftin qiymətini hansı həddə götürməlidir?” sualına ümjumilikdə 102 nəfər münasibət bildirib.
Sorğunun nəticələrinin təhlili göstərir ki, rəyi soruşulanların 13%-i hökumətin fikrini bölüşür. Sorğuda iştirak edənlərin 79%-i hesab edir ki, hökumətin götürdüyü 50 dollarlıq hədd yüksəkdir. 8% hesab edir ki, bu hədd daha da artırıla bilər.
Sorğu iştirakçıları (30%) əsas üstünlüyü 45 dollara verib. Onların 27%-i neftin qiymətinin 40 dollardan, 10%-i 35 dollardan götürülməsinə tərəfdardır. 12% respondent hesab edir ki, büdcədə neftin qiyməti hətta 30 dollardan da az olmalıdır. Bundan başqa 55 dollar (4%), 60 dollar (2%) və hətta 70 dollar (2%) görmək istədiyini qeyd edənlər də olub.
Banco.az "budget.az"a istinadən xəbər verir ki, İnternet sorğusunda sosioloji və texniki parametrləri gözləmək mümkünsüz olduğundan sorğunun nəticələri həqiqi ictimai rəylə üst-üstə düşməyə bilər.
