Müəllif: Gülnar Əhmədli, Banco.az
Azərbaycanda işsiz şəxslərin sığorta ödənişi alacağı halların sayı artırılıb. Belə ki, ödəniş alacaq işsizlərin dairəsi genişləndirilib.
Banco.az xəbər verir ki, bu məsələ Milli Məclisin dekabrın 8-də keçirilən iclasında müzakirəyə çıxarılan “İşsizlikdən sığorta haqqında” qanuna təklif edilən dəyişiklikdə əksini tapıb.
Dəyişikliyə əsasən torpaq payı olan vətəndaşların da işsizlikdən sığorta ödənişi almaq hüququ olacaq. Qanuna işsizlikdən sığorta ödənişinin ödənilməsi üçün əsas olan əmək müqaviləsinə xitam verilməsinin əsasları əlavə edilir.
Həmçinin oxu: İşsizlər dövlətdən necə və nə qədər pul ala bilər?- DETALLAR
İqtisadçı Vüqar Bayramov məsələ ilə bağlı bildirib ki, "İşsizlikdən sığorta haqqında" qanuna edilən yeni dəyişikliklər ilə sığorta ödənişi alacaq işsizlərin dairəsi genişlənəcək: "Belə ki, yeni dəyişikliklərə əsasən müəssisəinin mülkiyyətçisi dəyişəndə, əvvəlllər müvafiq işdə çalışan işçi işə bərpa ediləndə, həmin müəssisədə çalışmış işçi müddətli hərbi xidmətdən ehtiyata buraxıldılqdan sonra öz işinə qayıtdıqda da ödənişlər ediləcək.
Eyni zamanda, sığorta ödənişinə görə əlavə ailədəki bütün uşaqlara şamil ediləcək. İndi bu əlavələr 20 faiz ilə məhdudlaşır. Yeni dəyişliklər ilə isə məhdudlaşma olmayacaq. Bu zaman həmin ödəniş müddətli əmək müqaviləsinin bitməsi ilə xitam hallarına da şamil ediləcək".
İqtisadçının sözlərinə görə, işsizlərə sığorta verilməsi zamanı müddətli əmək müqaviləsi üzrə tələb oluna sığorta stajının 30 aydan 24 ayadək endirilməsi də həyata keçirilir: "Bu daha çox vətəndaşların ödəniş almasına imkan yaradacaq.
Digər dəyişiklik fərdi məşğulluq proqramının üzürlü səbəbdən icra edilə bilmədiyi halda ödənişlərin verilməsidir. Bu zaman qanunda üzürlü halların konkret olaraq müəyyənləşdirilməsi də həyata keçirilib.
Bütövlükdə, qanuna edilən dəyişiklik sığorta ödənişlərinə əlçatanlığı artırmaqla yanaşı daha çox vətəndaşımız bu imkandan faydalanmasına şərait yaradacaq".
Bizi sosial şəbəkələrdən izləyin!!
