Azərbaycanda İslam bankçılığının zəruri olub-olmaması qanunların təhlili ilə ortaya çıxa bilər

Azərbaycanda İslam maliyyəçiliyinin inkişafına dair təkliflər hazırlamaq üçün “Ekvita Consulting” konsorsiumu və avropalı ekspertlər cəlb olunublar.

Hökumətdən verilən xəbərə görə, ölkədə İslami bankçılığı xidmətlərini tətbiq etmək imkanlarına dair ekspertlər tərəfindən hazırda mövcud qanunlar üzərində aparılan təhlillər başa çatandan sonra qənaətə gəlmək mümkün olacaq.

Ölkədə İslam maliyyəçiliyinin hüquqi əsaslarını hazırlamağa texniki dəstək layihəsinin həyata keçirilməsinə məsul qurum qismində layihənin benefisiarı olan İqtisadiyyat Nazirliyi tərəfindən Kiçik və Orta Biznesin İnkişafı Agentliyi (KOBİA) təyin olunub. Gələcəkdə isə İslam maliyyəçiliyi inkişaf etdikcə, bu maliyyə məhsullarına yeni sərmayə cəlb etmək üçün alternativ mənbə kimi istifadə oluna biləcək.

KOBİA-dan verilən məlumata görə, hazırda əsas məqsəd qüvvədəki qanunların İslam maliyyəçiliyi qaydalarına nə qədər uyğun olduğunu müəyyənləşdirməkdir.

“Bu istiqamətdə bir çox dövlət qurumları ilə iş aparılır. Alternativ bank maliyyəçiliyi modelləri Avropada, Türkiyədə, Qazaxıstanda, Böyük Britaniyada istifadə olunur. Hər halda alternativ maliyyə mənbələrinin tətbiqi ölkədə biznesi dəstəkləmək baxımından əhəmiyyətlidir”, – KOBİA-dakı mənbə bildirib.

İslam maliyyəçiliyi üçün hüquqi baza hazırlamaq məqsədi ilə İslam İnkişaf Bankı hökumətə 200 min dollar məbləğində texniki yardım ayırıb. Müvafiq qrant sazişi 2017-ci ilin yanvar ayında imzalanmışdı.

Hazırda bankçılıq sahəsindəki mövcud qanunlarda ikili vergitutma ilə bağlı məsələlərin açıq qalması, həmçinin şəriət və İslam dini qayda-qanunlarına əsaslanan həmin bankçılıq məhsulları ilə bağlı faiz dərəcələri və onların təyini, müəyyən sahələrdə əməliyyatlara qadağa qoyulması kimi məhdudiyyətlər üzündən bu kimi məhsulların ölkədəki tətbiqi xeyli çətindir.

Qeyd edək ki, Azərbaycan 1992-ci ildən İslam İnkişaf Bankının üzvüdür.

Report.az