Qanunverici hakimiyyətin islahatı davamlı iqtisadi inkişafımıza xidmət edəcək.
Bu sözləri Yeni Azərbaycan Partiyasının növbədənkənar Parlament seçkilərinin keçirilməsi təşəbbüsünə münasibət bildirən İqtisadi İslahatların Təhlili və Kommunikasiya Mərkəzinin icraçı direktoru, iqtisad elmləri doktoru Vüsal Qasımlı deyib.
O bildirib ki, dövlət hakimiyyəti qollarından icra hakimiyyəti və məhkəmə hakimiyyəti istiqamətlərində ölə başçısının rəhbərliyi ilə islahatlar yeni mərhələyə qədəm qoyub: “Bu baxımdan hakimiyyətin digər qolu - qanunvericilik hakimiyyətinin də islahatına ehtiyac yaranmışdı. Çünki qanunvericilik, icra və məhkəmə hakimiyyətlərinin qarşılıqlı və uzlaşdırılmış fәaliyyәtini təmin etmək üçün islahatların bütün dövlət idarəetmə sistemini əhatə etməsi vacibdir. Təsadüfi deyil ki, Azərbaycan Dünya Bankının hazırladığı “Hökumətin effektivliyi” subindikatoru üzrə 2007-2018-ci illərdə regionda ən çox irəliləyişə nail olmuş ölkədir. Çünki Azərbaycanda dövlət idarəetmə islahatları BMT-nin davamlı inkişaf məqsədləri, yaxşı idarəetmə və açıq hökumət prinsiplərinə uyğundur. Bu ilin dekabrında bələdiyyə seçkilərinin də keçirilməsi nəzərdə tutulur ki, bu da yerli idarəetmənin də yeni dövrün tələbinə və islahat gündəliyinə uyğun olaraq yenilənməsini ehtiva edir. Parlament cəmiyyətin yeni çağırışlarının hakimiyyətdə yeni təmsilçilər vasitəsilə çatdırmaq üçün uyğun bir platformadır. Parlamentin yeni tərkibi cəmiyyətin islahata köklənmiş hazırkı əhval-ruhiyyəsini daha dolğun ifadə edə bilər. Növbədənkənar seçkilər imkan verəcək ki, Azərbaycan vətəndaşı məhz bugünkü qayğılarını, gözləntilərini, maraqlarını və iradəsini səs verəcəyi namizədlər üzərindən qanunverici hakimiyyətə çatdırsın. Beləliklə, bu islahat da vətəndaş mərkəzli olmaqla daha çox əhalinin maraqlarına xidmət edəcək”.
“Ölkədə dərinləşən iqtisadi, sosial və məhkəmə-hüquq islahatlarına paralel olaraq siyasi islahatların aparılması, indiki halda qanunverici hakimiyyətin islahatı mühüm əhəmiyyət kəsb edir. Məhz belə genişmiqyaslı və sistemli islahatlar təkamül prinsipinə uyğun olaraq kataklizmlərdən qaçmaqla həyata keçirilir. İslahatların ahəngdarlığı və rəvan xətti onun dövlətə, əhaliyə və biznesə daha faydalı olmasını təmin edir. Dövlətimizin başçısı tərəfindən islahatların belə sistemli həyata keçirilməsi biznes gözləntilərinin yaxşılaşmasına xidmət edir. Bu halda “Deloitte” şirkətinin Azərbaycanda apardığı sorğularla bağlı nəticələri də diqqətinizə çatdırmaq istəyirəm. Belə ki, ölkəmizdə fəaliyyət göstərən, illik 100 milyondan artıq dövriyyəsi olan şirkətlərin 87 faizi fikirləşir ki, onların gəlirləri daha da artacaq. “Ernst Young”ın sorğularının nəticələrinə görə, 2018-ci ildə Azərbaycanda işləyən Avropa şirkətlərinin 33 faizi hesab edirdi ki, ölkənin vergi sistemi effektivdir, 2019-cu ildə isə bu faiz 45-ə yüksəlib. Rəyi soruşulan şirkətlərin 75 faizi 2019-cu ildə Azərbaycanı əlverişli investisiya məkanı kimi qiymətləndirib. Bu onu göstərir ki, biznes Azərbaycandakı islahatlar kursuna inanır”, – deyə V.Qasımlı qeyd edib.
