“Azərbaycan Sənaye Bankı” ASC 2018-ci ili 3 milyon 946 min manat xalis mənfəət ilə başa vurub. Halbuki Bank, 2017-ci ili 4 milyon 357 min manat xalis mənfəətlə bağlamışdı. İllik müqayisədə Bankın xalis mənfəəti 9,4% azalıb.
2017-ci ildə 24 milyon 456 milyon manat faiz, 6 milyon 965 min manat qeyri-faiz gəliri əldə etmiş "Azərbaycan Sənaye Bankı", 2018-ci ildə 24 milyon 888 min manat faiz, 2 milyon 698 min manat qeyri-faiz gəliri əldə edib. Beləliklə, Bankın faiz gəlirləri cüzi artıb, qeyri-faiz gəlirləri isə 2,6 dəfə azalıb.
Ötən il “Azərbaycan Sənaye Bankı” ASC 27 milyon 586 min manat cəmi gəliri əldə etmək üçün 25 milyon 795 min manat xərc çəkib. Nəticədə Bankın 1 milyon 791 min manat əməliyyat mənfəəti yaranıb (2017-ci ildə Bankın əməliyyat mənfəəti 6 milyon 693 min manat təşçkil etmişdi. 3,7 dəfə azalma olub). Əvvəlki illər ehtimal olunan depozit və kredit itkiləri üçün yaradılmış ehtiyatın 3 milyon 167 min manatı azad olduğundan Bankın vergi ödənilənədək xalis mənfəəti 4 milyon 958 min manat olub. Ötən il “Azərbaycan Sənaye Bankı” 1 milyon 12 min manat mənfəət vergisi ödəyib. Beləkilə Bank, ötən ili 3 milyon 945 min manat xalis mənfəət ilə bağlayıb.
"Azərbaycan Sənaye Bankı"nın əməliyyat mənfəət 2016-cı ildə 8 milyon 344 min manat, 2017-ci ildə isə 6 milyon 693 min manat təşkil etmişdi. İldən ilə Bankın xərcləri daha çox gəliri "yeyir".
BANK KİÇİLİB
31 Dekabr 2018-ci il tarixində “Azərbaycan Sənaye Bankı” ASC 822 milyon 311 min manat cəmi aktivlərə, 730 milyon 282 min manat cəmi öhdəliklərə və 92 milyon 29 min manat cəmi balans kapitalına malik olub. 31 Dekabr 2017-ci il tarixində “Azərbaycan Sənaye Bankı” ASC 945 milyon 189 min manat cəmi aktivlərə, 945 milyon 189 min manat cəmi öhdəliklərə və 90 milyon 358 min manat cəmi balans kapitalına malik idi. Beləliklə, illik müqayisədə Bankın aktivləri 13% azalıb.
"Azərbaycan Sənaye Bank"nın müştərilərə verdiyi kreditlər 2017-ci ilin sonundakı 298 milyon 830 min manatdan 2018-ci ilin sonunda 285 milyon 950 min manata düşüb.
“Azərsun Holdinq”ə daxil olan “Azərbaycan Sənaye Bankı” ASC-nin səhmlərinin 94,2517 %-i “Anadolu İnvestment Kompani” MMC –yə, 5,1735 %-i “Azərbaycan Sənaye Sığorta” ASC –yə və 0,5748 %-i “Azərbaycan Sənaye Lizinq” MMC –yə məxsusdur.
Azərbaycanın ən böyük özəl şirkətlərindən biri olan "Azərsun Holdinq" MMC-də ixtisarlar aparılıb.Məlumata görə, şirkətdə çalışan 100-ə yaxın işçi vəzifəsindən azad edilib. "Azərsun Holdinq"in İctimaiyyətlə Əlaqələr və Biznesin inkişafına dəstək departamentinin müdiri Afiq Səfərov "Marja"ya açıqlamasında bildirdi ki, holdinqdə xərclərin azaldılması üçün daha effektiv idarəetmənin tətbiqinə başlanılıb. 100 nəfərə yaxın işçi ötən il ixtisar olunub.
Marja
