"AtaSığorta" qənaət ilə mənfəətə çıxıb | Banco.az

"AtaSığorta" qənaət ilə mənfəətə çıxıb

100% "AtaHoldinq" şirkətinə məxsus olan "AtaSığorta" ASC 2019-cu ilin 1-ci yarısını 1 milyon 113 min manat xalis mənfəət ilə başa vurub. Halbuki, şirkət ötən ilin eyni dövrünü 2 milyon 350 min manat xalis zərər ilə bağlamışdı. Bu il "AtaSığorta"nın mənfəətə çıxması ehtiyatdan azadolma və işlərin aparılması xərclərinin azaldılması hesabına baş verib. Şirkətin topladığı sığorta haqları azalıb, sığorta ödənişləri isə artıb.

Cari ilin yanvar-iyun dövründə "AtaSığorta"nın cəmi gəlirləri 14 milyon 27 min manat, cəmi xərcləri isə 12 milyon 914 min manat təşkil edib. Şirkət ilk 6 ayda mənfəət vergisi ödəməyib.

Müqayisə üçün qeyd edək ki, ötən ilin yanvar-iyun dövründə "AtaSığorta"nın cəmi gəlirləri 8 milyon 620 min manat, cəmi xərcləri isə 10 milyon 970 min manat təşkil etmişdi.

Ötən ilin ik 6 ayında toplanmış sığorta haqları 10 milyon 277 min manat ikən, bu ilin eyni dövründə 9 milyon 365 min manat təşkil edib (azalıb). Sığorta ödənişləri isə 3 milyon 961 min manatdan 7 milyon 152 min manata yüksəlib.

Ən sərfəli kredit üçün müraciət et

Ötən il "AtaSığorta" sığorta ehtiyatının yaradılmasına 3 milyon 216 min manat ayırdığından xərcləri gəlirlərini üstələmişdi. Bu ilin 1-ci yarısında isə ehtiyatın 3 milyon 448 min manatı azad olub və gəlirə əlavə edilib.

Şirkətin investisiya gəlirləri də azalıb. Ötən ilin 6 ayında 1 milyon 255 min manat təşkil etmiş bu növ gəlirlər bu ilin eyni dövründə 1 milyon 102 min manata düşüb.

"AtaSığorta" yarımillik işlərin aparılması xərclərini azaldaraq 6 milyon 104 min manatdan 4 milyon 807 min manata endirib.

Bu ilin May ayında "AtaSığorta"nın İdarə Heyətinin sədri Museyib Əliyevin səlahiyyətlərinə xitam verilib və sədr vəzifəsinə Orxan Məmmədov gətirilib.

Marja

Ən sərfəli krediti almaq üçün müraciət et

Bank işi kursları

Banco Academy

Qeydiyyatdan keç