31 yanvar 2019-cu il tarixinə Azərbaycanda fəaliyyət göstərən bankların cəmi aktivləri 29 milyard 602.9 milyon manat, cəmi öhdəlikləri isə 25 milyard 485.6 milyon manat təşkil edib. 

Maliyyə Bazarlarına Nəzarət Palatsının yaydığı məlumata görə, sektorun balans kapitalı 4 milyard 117.3 milyon manat olub.

2019-cu ilin yanvar ayı ərzində bank sektorunun aktivləri 0.3% (100.4 milyon manat), öhdəlikləri 0.2% (55 milyon manat), balans kapitalı isə 1.1% (45.4 milyon manat) artıb. Bankların kredit portfeli 12 milyard 541  milyon manat təşkil edib.

2019-ci ilin yanvar ayında fiziki şəxslərin əmanətləri 7 milyard 980.7 milyon manat təşkil edib. Daha sabit maliyyələşmə mənbəyi hesab olunan müddətli əmanətlər 0.4% (21.1 milyon manat) artaraq 5 milyard 500.1 milyon manat olub.

Yanvar ayında bankların əməliyyat mənfəəti 78.2 milyon manat, xalis mənfəəti isə 42.6 milyon manat təşkil edib.

Fəaliyyət göstərən 30 bankın filiallarının sayı 508, şöbələrinin sayı 130, ATM-lərin sayı 2 510 olub. Bank  sektorunun  işçi  heyətinin sayında artım yanvar ayında da davam etmişdir. Belə ki, 2019-cu ilin ilk ayında işçi sayı 1.0% (173 nəfər) artaraq 17 588  nəfər təşkil edib.

31 yanvar 2019-cu il tarixinə bank sektorunun əsas göstəriciləri bank sektorunun icmal göstəricilərində öz əksini tapıb.