Maliyyə Bazarlarına Nəzarət Palatasında (Palata) Azərbaycan tarixinin ən faciəli və eyni zamanda şərəfli səhifəsi olan, həmçinin müstəqillik uğrunda mübarizəsinin qəhrəmanlıq nümunəsi olan Qanlı 20 Yanvar faciəsinin 28-ci ildönümünə həsr olunmuş tədbir keçirilib.
Tədbirin əvvəlində Azərbaycanın müstəqilliyi və ərazi bütövlüyü uğrunda canından keçən şəhidlərin ruhu bir dəqiqəlik sükutla yad olunub.
Tədbiri açan Palatanın Baş icraçı direktoru İbrahim Alışov bildirdi ki, 1990-cı il yanvarın 20-si Azərbaycanın müasir tarixinə ən faciəli günlərdən biri, eyni zamanda, xalqın qəhrəmanlıq səhifəsi kimi daxil olub, milli müstəqillik, azadlıq uğrunda mübarizəsinin və yenilməz iradəsinin rəmzinə çevrilib.
SSRİ rəhbərliyinin Azərbaycana qarşı qərəzli, ermənipərəst siyasətinə, əzəli torpaqlarımıza iddia edən Ermənistanın təcavüzkar siyasətinin açıq-aşkar dəstəklənməsinə və respublikanın o zamankı rəhbərliyinin xəyanətkar mövqeyinə etiraz əlaməti olaraq ayağa qalxmış geniş xalq kütlələrinə qarşı sovet ordusunun iri hərbi birləşmələrinin yeridilməsi Azərbaycanda, xüsusilə Bakıda misli görünməmiş faciəyə gətirib çıxardı, böyük itkilərlə, günahsız insanların ölümü ilə nəticələndi. Buna baxmayaraq, Azərbaycanın o vaxtkı səriştəsiz rəhbərlərinin yenə də xalqla bir olmağa cəsarəti çatmadı və onlar sovet rəhbərliyinin ətəyindən tutmaqda davam etdilər.
İ. Alışov qeyd etdi ki, 20 Yanvar hadisəsinə ilk rəsmi etiraz edən, xalqını bu ağır günlərdə tək qoymayan xalqımızın böyük oğlu, ümummilli lider Heydər Əliyev yanvarın 21-də Azərbaycanın Moskvadakı daimi nümayəndəliyinə gələrək terror aktını pisləyən bəyanatla çıxış etdi. Məhz ümummilli Liderin 1993-cü ildə siyasi hakimiyyətə qayıdışından sonra 20 Yanvar faciəsinin baş verməsinin səbəblərinin araşdırılması və onu törədənlərin məsuliyyətə cəlb olunması istiqamətində mühüm addımlar atıldı.
Ümummilli Liderin siyasi xəttini böyük uğurla davam etdirən Prezident İlham Əliyev şəhid ailələrinin və sağlamlıqlarını itirmiş şəxslərin problemlərinin həllinə dəstək göstərdiyini qeyd edən İ. Alışov tədbir iştirakçılarının diqqətinə çatdırdı ki, 20 Yanvar şəhid ailələrinin həyat səviyyəsinin yaxşılaşdırılması dövlət səviyyəsində mühüm vəzifələrdən biri kimi qarşıya məqsəd qoyulub. Dövlətimizin başçısının Sərəncamı ilə 20 Yanvar şəhidlərinin ailələrinə Prezident təqaüdü təyin edilib və daim yardımlar göstərilir. Şəhidlərin xatirəsinin əbədiləşdirilməsi məqsədilə ölkəmizdə bir çox abidə kompleksi yaradılıb.
Tədbirdə həmçinin "20 Yanvar faciəsinin iyirmi səkkizinci ildönümünün keçirilməsi ilə bağlı Tədbirlər Planı”na uyğun olaraq Palatanın sifarişi əsasında hazırlanmış 20 Yanvar faciəsinə həsr olunan film tədbir iştirakçılarına nümayiş etdirilib.
Qeyd edək ki, 20 yanvar tarixində şəhidlərin xatirəsini yad etmək üçün Maliyyə Bazarlarına Nəzarət Palatasının işçi heyəti Şəhidlər xiyabanını ziyarət edəcəkdir.
