ABŞ-ın "qara siyahı"ya saldığı Çinin texnologiya şirkəti Huawei-yə Google-ın ardından bir zərbə də Microsoft tərəfindən vuruldu. ABŞ-ın texnologiya nəhəngi Microsoft-un onlayn mağazası vasitəsilə satılan Huawei-nin kompüter modelləri satış siyahılarından çıxarılıb.
Kompüterlərində Microsoft-un Windows əməliyyat sistemini istifadə edən Huawei-nin modelləri artıq Microsoft-un onlayn mağazası Microsoft Store-da yer almır.
Microsoft-un mağazasında Huawei-nin məhsullarını axtaran istifadəçilər bu xəbərdarlıq mesajı ilə qarşılaşırlar: "Təəssüf ki, istədiyiniz səhifə tapılmadı".
Huawei-nin Apple-ın MacBook Pro-larına rəqib olaraq təqdim etdiyi Huawei Matebook X Pro modeli Microsoft-un mağazaları vasitəsilə satışa təqdim edilmişdi.
Huawei MateBook X Pro-nun i5 prosessor, 8 GB RAM və 512 GB-lik yaddaş xüsusiyyətinə malik olan modeli 1599 Avroya, i7 prosessor, 16 GB RAM və 1 TB yaddaşı olan modeli isə 1999 Avroya keçən ay satışa çıxmışdı.
Microsoft-un Çin şirkəti ilə Windows lisenziya razılaşmasına davam edib-etməyəcəyi bilinmir.
Yaşanan bu son vəziyyət Huawei-ni mobil cihazlarının ardından kompüterləri üçün də yeni bir əməliyyat sistemi axtarışına məcbur edir.
Bilindiyimiz kimi, keçən həftə ABŞ Prezidenti Donald Trampın rəhbərlik etdiyi hökumət tərəfindən verilən qərar ilə, Huawei daxil 70-ə qədər şirkət "qara siyahı"ya daxil edilmişdi. Qərara görə, siyahıdakı şirkətlərin ABŞ-da istehsal edilən məhsullardan və xidmətlərdən bir qərar olmadığı müddətdə istifadə edə bilməyəcəkləri açıqlanmışdı. Google da Çinli texnologiya şirkəti Huawei-nin ABŞ tərəfindən "qara siyahı"ya salınmasının ardından, Huawei istifadəçilərinin Google məhsullarına çıxışını təxirə saldığını açıqlamışdı.
Daha sonra ABŞ Huawei-yə 90 gün möhlət verdiyini açıqlanmışdı. Çin şirkəti bu müddəti ərzində, dünya səviyyəsindəki əməliyyatlarının təsirlənməməsi üçün ABŞ-da istehsal edilən məhsulları satın almağa davam edə biləcək.
"YENİ ƏMƏLİYYAT SİSTEMİ BU İL HAZIR OLACAQ"
Huawei-də İstehlakçı İş Qrupunun direktoru Richard Yu Huawei-nin öz əməliyyat sisteminin payıza qədər ağıllı telefonlar və kompüterlərdə istifadəyə hazır olacağını açıqlayıb.
Richard Yu əməliyyat sisteminin beynəlxalq bazarlar üçün 2020-ci ilin ilk ya da ikinci rübündə hazır olacağını söyləyib.
Richard Yu yalnız Huawei-nin Google və Microsoft ilə əməkdaşlığın tamamilə dayanması vəziyyətində şirkətin öz proqram sistemini inkişaf etdirəcəyini vurğulayıb.
Richard Yu, "Hələ Microsoft Windows və Google Android əməliyyat sisteminə bağlıyıq. Lakin bunu istifadə edə bilməzsək, Huawei öz B planını hazırlayacaq və öz əməliyyat sistemini istifadə edəcək" deyib.
Marja
