"Bank Respublika" ASC-nin səhmdarlarının pay bölgüsü dəyişib.

"Report"un məlumatına görə, dəyişiklik Bankın nizamnamə kapitalının 10 000 067 və yaxud 17,4% artırılaraq 67 461 088,1 manata çatdırılmasından sonra baş verib.

Belə ki, "Bank Respublika"nın kapital artımı üçün dövriyyəyə buraxdığı, hər birinin nominal dəyəri 2,45 manat olan 4 081 660 ədəd yeni səhmi Bankın əsas sahibi və Müşahidə Şurasının (MŞ) üzvü olan Natiq Saday oğlu Quliyev əldə edib. Son nəticədə onun “Bank Respublika”dakı payı 45,6709%-dən 53,7243%-ə yüksəlib.

Əvəzində, digər səhmdarların Bankdakı payı azalıb. Belə ki, Almaniyanın DEG investisiya şirkətinin payı 10,8656%-dən 9,255%-ə, "Sparkassen International Development Trust" şirkətinin payı 5,4328%-dən 4,6275%-ə, Elçin Saday oğlu Quliyevin (MŞ-nın üzvü) payı 9,8933%-dən 8,4268%-ə, Sevda Saday qızı Quliyevanın payı 9,4708%-dən 8,0669%-ə, Saday Əsəd oğlu Quliyevin payı 9,3635%-dən 7,9755%-ə, Mariya Heydər qızı Quliyevanın payı 9,1707%-dən 7,8113%-ə, digər 3 hüquqi və 9 fiziki şəxsin payı isə 0,1323%-dən 0,1127%-ə dəyişib.

Başqa sözlə, Quliyevlər ailəsi "Bank Respublika"dakı payını 83,57%-dən 86%-ə çatdırıb, Almaniya şirkətlərinin isə payı kapital artımında iştirak etmədikləri üçün avtomatik olaraq 16,3%-dən 13,88%-ə dəyişib.

Xatırladaq ki, "Bank Respublika" ASC 1992-ci ildə yaradılıb.